Na 'n egskeiding wat haar finansieel byna ruïneer, reis Esli Kaap toe. 'n Wonderwerk gebeur: sy ontmoet vir Francois, hulle trou, en uiteindelik is die geluk, vrede en veiligheid waarna sy haar lewe lank gesmag het, haar beskore.
Maar haar stryd is nog nie verby nie. Esli kan haar nie volledig losmaak van die verlede nie. Post-traumatiese stres na jare se mishandeling aan die hand van 'n narsis, en 'n nuwe omgewing waarin sy haar lewenspad van voor af moet uitkerf, bring onverwagse uitdagings en vrae.
'n Vrou staan op, die vervolg op Ilse Verster se blitsverkoper So lyk 'n vrou, vertel van Esli se ervarings op pad na heelwording. Haar storie dien as inspirasie vir slagoffers wat in die doodloopstraat van 'n verhouding met 'n narsis vasgevang is, om hul lewens oordeelkundig te herbou en slaggate te vermy.