Elke voortvlugtige is 'n ontdekkingsreisiger en elke reisiger 'n vlugteling, en Adam Richter was geen uitsondering nie. Daar was wraak by die dam en 'n storm op die see en smokkelaars en hippies en gewone tortelduiwe en enorme vlermuise, en later 'n hardkoppige rooikop - onder andere.
Sy lewe was nie een lang, uitgerekte verhaal soos die van die meeste ordentlike mense nie. Eerder 'n bondel erg teenstrydige stories, in chaos verweef. Van hulle was naiëf en onskuldig. Van hulle wreed en donker en verskriklik en selfs boos ... maar van hulle so beautiful soos die bewegings van Lamu se laaste doegong.
Die moeilik om te glo dat so iemand rêrig bestaan, sou die mense later sê, want vreemde dinge het gebeur. Dinge wat hom soos 'n onsigbare magneet noord sou trek, seelangs, die laaste wildernis in. Want Adam het 'n geheim gehad, so groot dat hy eers moes doodgaan en wegraak voor hy kon opstaan en oor begin.